二零二零年九月三十日（星期三）
因為疫情關係，今年注定無得飛，本來恆仔生日時book咗迪士尼酒店都因為第三波疫情而取消咗。終於見疫情稍為舒緩，於是又趁逸逸生日再book迪士尼酒店住一晚。
今日上午逸逸要返學（復課才第二天），學校舉行中秋慶祝會和生日會，既然有年票，住迪士尼酒店梗係順便去埋迪士尼樂園，所以放學後就直接出發去迪士尼樂園了。
自7月買了年票沒多久，迪士尼樂園就再次因為疫情而關閉，9月25日才重新開放，迪士尼亦為奇妙處處通會籍的有效日期延長110日，我們的年票可以玩到2021年11月。
入場之後首先去幫逸逸換返個生日襟章先，逸逸生日快樂！
嘩！新城堡的正面已經拆晒棚，真係好靚，依家係最佳拍攝位置仲可以排隊搵攝影師幫手影相，影返張全家福先！
本來諗住入到場先去食午餐，但壽星女話好掛住小小世界，想去玩咗先！
自從上次去迪士尼之後就對小小世界著了迷，跟住經常嚷著要看我錄了大約30秒的video小小世界選段，所以今次恆仔特登拍咗小小世界full version，逸逸今次仲學識咗咩叫做皮影戲。
小小世界外面每15分鐘一次的人偶演出都一樣咁吸引。
我地去咗火箭餐廳食午餐，我食特級芝士牛肉漢堡包套餐，恆仔食炸雞籃套餐，味道都正常，逸逸就幫佢叫咗個兒童餐—兒童磨菇雞扒包配粟米，不過逸逸唔太鍾意雞扒，淨係食包同粟米，仲有食咗我地好多薯條。
逸逸是9月壽星，奇妙處處通會員於園內餐廳可享買一送一優惠，又抵咗。
食完嘢見到對面的史達工業呈獻：鐵甲奇俠裝備展終於唔算太多人，於是去排下隊。其實我都知主要是同Ironman影相，但叫得裝備展我以為起碼有電影入面工作室的規模，點知原來只有影相位入面兩件盔甲，仲要依家要保持社交距離只能遠距離selfie同埋人少少都等得有D耐，超級失望，亦慶幸之前多人時無花時間排隊⋯⋯
之後我地去玩轉轉杯，逸逸突然間開心大發現後面依隻茶壺入面的小老鼠，話覺得佢好搞笑，所以笑得好開心，口罩都遮唔住佢sweet sweet 的笑容。
每次玩轉轉杯都玩得好開心
近排逸逸好鍾意公主，於是我介紹佢去參觀遭話園林，即時就迷上了。
動聽的音樂、會動的公仔、需要參觀者參予攪動齒輪才有反應，加上以公主為主題，全部都是小女孩喜歡的元素，點會唔鍾意？
睇完童話園林出到嚟，見到識自己郁同識講嘢嘅垃圾桶，逸逸覺得好有趣，一直跟住垃圾桶後面走，垃圾桶行到邊跟到邊。
垃圾桶發現逸逸身上的生日襟章，同逸逸講：生日快樂呀米妮！逸逸笑得好開心，之後仲不時講話垃圾桶以為我係米妮，其實我係假架，哈哈。
之後我地去咗玩小飛象，遊人已經越來越多，我地都排左差不多20分鐘，今次迪士尼真係明顯比7月時多左好多人。
之後去咗睇米奇幻想曲，一年前的逸逸睇米奇幻想曲驚到震，一年後的今日雖然還是有點緊張，但鎮定咗好多，起碼唔駛除眼鏡。
其實米奇幻想曲都等咗有半個鐘，逸逸都開似頂唔順要爸爸抱咗一陣，等待期間見到高飛係外面經過，大家都精神為之一振。
因為周圍都係排隊的人龍，我地同逸逸講不如玩多次小小世界就去酒店⋯⋯
點知外面寫住小小世界話要排40分鐘，好彩逸逸都肯唔玩直接走。
一早講咗逸逸可以係迪士尼揀份生日禮物，最近逸逸很喜歡Aristocats，而三隻小貓入面逸逸最鍾意的就係Toulouse，而今日係小鎮大街的舖頭竟然見到好少出精品的Toulouse公仔，逸逸即時就決定咗要Toulouse了。至於點解買埋Berlioz同Marie，因為我想買晒成套囉，逸逸對於竟然可以帶晒三個返屋企而唔係只係得Toulouse，絕對係喜出望外。